I dag gjekk turen ned til Gapahuken ved
Gurineset. Vi trilla opp dit, men så var det tid for at Knøttene skulle få
bruke kroppen sin. Eit av måla for denne perioden er at barna skal få oppleve
naturen gjennom alle årstider. No er det kaldt, og snøen er frosen, slik at dei
fekk erfaringar med å gå på glatt underlag. Her ved gapahuken var det nokre
bare flekkar med gras, så nokre plassar var det lettare å gå. Dette er
kjempegod trening for sansane, og vi får nytte nesten alle sansane våre på
denne turen. Spesielt Balansesansen fekk prøvd seg mykje.
Det var mange ulike spor å sjå i snøen,
både frå dyr og menneske. Men for dei fleste var det utfordrande nok å halde
seg på beina, på det varierande underlaget. Og då er det trygt og godt å ha ei
hand å halde i, og nokon som kan hjelpe ein opp når ein ikkje greier å halde
balansen. 😊
Ein kjekk gjeng å ha med på tur som held humøret oppe, til tross for nokre
fall. Det er kjekt å sjå kor mykje dei har utvikla seg sidan barnehagestart i
haust. Og vi gler oss til mange fleire turar framover.
Rammeplanen seier at gjennom arbeid med kropp, rørsle, mat og helse
skal barnehagen bidra til at barna
opplever trivsel, glede og meistring ved allsidige rørsleerfaringar,
inne og ute, året rundt.
