TRYGGHEIM BARNEHAGE VATNE: Julevandring i Vatne kyrkje

torsdag 10. desember 2015

I dag var avdeling Maurtua til Vatne kyrkje på Julevandring.

Vi starta med å helse på keisar Augustus.

Og så fekk barna skrive seg inn i manntalet.

Dei tre vise menn med gavene til Jesusbarnet,

gull, røykelse og myrra.

Engelen Gabriel og englekoret øver på englesongen.

Stjerna viser veg til der den nye kongen vert fødd.

Gjetarane fekk besøk av englane.

Josef og Maria med Jesusbarnet under Betlehemsstjerna.

.......................

Takk til dei tilsette i Vatne kyrkje.

.......................

Målet med aktiviteten:

· Gjennom arbeidet med etikk, religion og filosofi skal barnehagen bidra til at barna får:

- innsikt i grunnleggjande verdiar i kristen arv og tradisjon, og deira plass i kulturen

- får kjennskap til kristne høgtider og tradisjonar.

· Fordi vi går til kyrkja blir barna og kjend med nærmiljøet vårt og kvar kyrkja ligg.

Vårt pedagogiske grunnsyn er bygd på det kristne verdigrunnlaget og på Bibelen sitt syn på mennesket. Vi ynskjer at dei tilsette i barnehagen skal sjå på barna, foreldra, sine medarbeidarar og seg sjølv slik Gud ser menneske. Jesus sette barna høgt. Han var glad i dei og ville at dei skulle kome til ham, og han heldt dei fram som førebilete for disiplane. Jesus sitt forhold til barna er eit førebilete for dei tilsette i barnehagen.
Vi ynskjer at barna får oppleve at dei blir verdsett, inkludert, finn vener, får utvikle seg etter sine eigne føresetnadar, får livsglede og lærer å ta omsyn til kvarandre og fungere i større og mindre grupper.

Vi er opptekne av at det skal vere mykje humor og glede i kvardagen.
Barnet utforskar verda. Læring og utvikling skjer gjennom samspel mellom barn-barn og barn-vaksne frå fyrste stund.
Kvardagen til barna er dei vaksne sitt ansvar. Vi vil vere gode rollemodellar for borna ved å skape gode relasjonar. Ekte interesse, innleving i barnet og undring saman med barnet er viktig.

Vi er bevisste på barnet sine ressursar og moglegheiter. Barnet sjølv er aktør i si eiga utvikling.
Vi vil vere empatiske vaksne som anerkjenner barnet, slik at barnet vert sett, høyrt og tatt på alvor. Respekt og likeverd er viktige stikkord.
Barn treng engasjerte vaksne som rettleiarar, men dei har rett til eigne meiningar og innverknad på eigen kvardag. Det er viktig å vere interessert i det barnet er opptatt av her og no.
Vi vil at barna skal kjenne seg trygge i barnehagen. Tryggleik og trivsel er grunnlaget for all positiv utvikling. Vi vil sjå etter det beste i barnet.

Foreldre og barnehagepersonalet har eit felles ansvar for barnet sin trivsel og utvikling. Det er viktig at foreldra føler dei har medverknad, at dei ser meining i det som skjer i barnehagen og at dei får støtte. Barnehagen skal i samarbeid og forståing med heimen ivareta barna sitt behov for omsorg og leik, og fremje læring og danning som grunnlag for allsidig utvikling.

Tilrettelegging for leik er ei viktig oppgåve. Å leike er ikkje berre eit pedagogisk verkemiddel for å fremje utvikling hos barnet.

Å leike er eit mål i seg sjølv.
Leiken gjev barnet glede.
Leiken fremjar utviklinga til barnet på alle område: Intellektuelt, språkleg, fysisk, sosialt og emosjonelt. I leiken utviklar og styrkjer barnet identiteten og sjølvkjensla si.