TRYGGHEIM BARNEHAGE VATNE: PÅ LEIT ETTER GARDSDYR

onsdag 5. august 2020

PÅ LEIT ETTER GARDSDYR

Dyr og dyrelydar er noko som fengjer Gul avdeling godt. Vi er difor stadig på leit etter sauar, hestar, kyr og for ikkje å snakke om Gurinespusen. Vi gjekk først forbi bedehuset, der stod hesten til Camilla så fint og ville helse på oss. «Iiiiiiiihji» kjem det i kor frå borna.

Vidare gjekk turen vår til Haugane. Opp ein bakke og rundt ein sving høyrer vi plutselig «klukk..klukk..klukk», skal tru kva som er nede på marka der?

Snille Johannes kom og inviterte oss ned til dei artige hønene sine. Dei er framleis kyllingar og har berre budd med dei i knappe to veker. Litt sjenerte sprang dei inn i huset sitt når nysgjerrige barnehender så gjerne ville helse på.

Johannes opna døra til hønsehuset for oss, så spente og nysgjerrige små fekk sjå inn. Der inne hadde hønene det godt og varmt. Stor stas å kome hit på besøk! J

Henriette – Gul avdeling

VÅRT PEDAGOGISKE GRUNNSYN

Vårt pedagogiske grunnsyn er bygd på det kristne verdigrunnlaget og på Bibelen sitt syn på mennesket. Vi ynskjer at dei tilsette i barnehagen skal sjå på barna, foreldra, sine medarbeidarar og seg sjølv slik Gud ser menneske. Jesus sette barna høgt. Han var glad i dei og ville at dei skulle kome til ham, og han heldt dei fram som førebilete for disiplane. Jesus sitt forhold til barna er eit førebilete for dei tilsette i barnehagen.
Vi ynskjer at barna får oppleve at dei blir verdsett, inkludert, finn vener, får utvikle seg etter sine eigne føresetnadar, får livsglede og lærer å ta omsyn til kvarandre og fungere i større og mindre grupper.

Vi er opptekne av at det skal vere mykje humor og glede i kvardagen.
Barnet utforskar verda. Læring og utvikling skjer gjennom samspel mellom barn-barn og barn-vaksne frå fyrste stund.
Kvardagen til barna er dei vaksne sitt ansvar. Vi vil vere gode rollemodellar for borna ved å skape gode relasjonar. Ekte interesse, innleving i barnet og undring saman med barnet er viktig.

Vi er bevisste på barnet sine ressursar og moglegheiter. Barnet sjølv er aktør i si eiga utvikling.
Vi vil vere empatiske vaksne som anerkjenner barnet, slik at barnet vert sett, høyrt og tatt på alvor. Respekt og likeverd er viktige stikkord.
Barn treng engasjerte vaksne som rettleiarar, men dei har rett til eigne meiningar og innverknad på eigen kvardag. Det er viktig å vere interessert i det barnet er opptatt av her og no.
Vi vil at barna skal kjenne seg trygge i barnehagen. Tryggleik og trivsel er grunnlaget for all positiv utvikling. Vi vil sjå etter det beste i barnet.

Foreldre og barnehagepersonalet har eit felles ansvar for barnet sin trivsel og utvikling. Det er viktig at foreldra føler dei har medverknad, at dei ser meining i det som skjer i barnehagen og at dei får støtte. Barnehagen skal i samarbeid og forståing med heimen ivareta barna sitt behov for omsorg og leik, og fremje læring og danning som grunnlag for allsidig utvikling.

Tilrettelegging for leik er ei viktig oppgåve. Å leike er ikkje berre eit pedagogisk verkemiddel for å fremje utvikling hos barnet.

Å leike er eit mål i seg sjølv.
Leiken gjev barnet glede.
Leiken fremjar utviklinga til barnet på alle område: Intellektuelt, språkleg, fysisk, sosialt og emosjonelt. I leiken utviklar og styrkjer barnet identiteten og sjølvkjensla si.

NLM BARNEHAGENE AS

onsdag 5. august 2020

PÅ LEIT ETTER GARDSDYR

Totalt antall sidevisninger

Bloggarkiv

Følgere